ما هى هي اسباب عقاب المواقع في محرك البحث جوجل
اول حاجة الناس بتفكر فيها إنهم اتعاقبوا بمجرد مايحسوا أنهم تراجعوا في نتايج البحث وده شئ غلط جداً وعشان تتعاقب لازم يحصل الأتي :
- تتراجع من النتيجة رقم 1 لصفحة تانية او ما بعدها .
- يكون في اجراء يدوي حتي لو فضلت رقم 2 .
طيب في حالة إن ده محصلش يبقى ياباشا موقعك كل اللي محتاجه شوية تظبيط وضخ مقالات وتحديث مقالاتك القديمة لأن كده في مواقع غيرك طلعت او موجودة قديمة او جديدة بتقدم افادة افضل منك او موقعك أبطئ او غيرك مهتم بتظبيط الموقع كـ seo أون بيدج وأوف بيدج بطرق شرعية ومضمونة .
اسباب عقاب المواقع في محرك البحث جوجل
1- اول حاجة بتعاقب الموقع او بتخلي ترتيبه يتراجع بشكل ملحوظ وكبير مش مجرد نتيجة او إتنين فقط هو الباك لينك
وانت بتعمل باك لينك لنفسك لازم تختار موقع قليل اوي لما حد في نفس مجالك يعمل فيه .
الباك لينك الإسبام اللي بتعمله ده أول شئ مضر جداً ليك وسبب عقاب .
الباك لينك المبالغ فيه الكتير بزيادة ده بيعتبر سبام .
الباك لينك في محتوى ملوش علاقة بمحتواك سبام .
الباك لينك اللي عبارة عن لينكات اكتر ماهو محتوى بيقدم افادة .
إزاي احل أزمة الباك لينك عندي
الموضوع بيحتاج صبر وثقة وشغل من نار + تنصل من أي رابط تشك أنه سبام او اتعمل بشكل مبالغ فيه أو مبيقدمش افادة محترمة .
إبدء بعد التنصل من الروابط لمدة تلت شهور في ضح محتوى جديد وتحديث مقالاتك القديمة وتقديم افادة محترمة .
وبعد التلات شهور شغل متواصل ابدء اعمل باك لينك جيست بوست من مواقع قوية في نفس مجالك ولكن ركز كويس اوي مينفعش تعمل باك لينك لصفحة مبيخشهاش زوار او جديدة ولسة مدخلهاش زوار من جوجل او حتى لسة متأرشفتش ومينفعش بالمرة تبالغ في الامر يعني ع كل 100 زائر للصفحة بشكل يومي تقدر تعمل للصفحة دي إسبوعياً 3 جيست بوست فقط وده افضل.
2- السبب التاني إعتمادك بشكل مباشر فقط علي زوار السوشيال ميديا
زوار السوشيال ميديا مهمين ولكن مترددين ومملين مبيحبوش يقروا الحاجة للاخر ومبيحبوش يتصفحوا الموقع وده بإختصار عشان اعلانك ظهرلهم بدون مايتعبوا في إنهم يعملوا سيرش عن الموضوع ده وده بنسبة 70% من زوار السوشيال وبالتالي اليوزر اكسبرينس عندك هيضرب بالنار لو قدرت تعمل موازنة انك تضمن بقاء زوار السوشيال عندك في موقعك فترة اكبر او فترة طويلة يبقى مفيش منها ضرر ولكن لو مقدرتش تضمن ده لازم تعمل موازنة محترمة وتخلي زوارك الأورجانيك هما استهدافك رقم 1 وبدل مابتعمل اعلانات في السوشيال اعملها في إعلانات جوجل وبكده إنت مستفيد بنسبة 100% .
3- السبب التالت المحتوى المهمل والقديم اللي طلع بعده محتوى قدم افادة اقوى منه
كل ماتحدث محتواك وتزود معدل الإفادة كل ماجوجل يحترمك ولكن اعمل موازنة محترمة مينفعش تخلي المقال عدد كلماته كبيرة وانت بتهري فيه ع الفاضي خلي دايما تحديثك ومقالك من الاول هو بيقدم افادة واضحة وصريحة وبيجاوب علي اي تساؤل بدون لف ودورات .
4- السبب الرابع عدم ضخ محتوى جديد بشكل يليق مع حجم زوارك
السبب ده بيقتل موقعك وده ليه لأن الزائر لما بيعجبه موقع بيعمل سيرش بإسمه في جوجل ولو المعدل ده مكنش ثابت او في ازدياد انت هتدمر موقعك وبالتالي لازم تضيف دايما مقالات جديدة بتناقش مواضيع جديدة ومختلفة في نفس محتوى موقعك وبالتالي تضمن إن الزائر هيلاقي جديد وهتزود الأعداد دي بسهولة .
5- السبب الخامس وضع روابط في موقعك لمواقع منافسة
بمعنى اصح انت بتقول لجوجل المواقع دي افضل من موقعي فاطبيعي هتبقى فوقيك .
6- السبب السادس عدم الإهتمام بأساليب الـ seo الحديثة اللي تخص الأون بيدج
لازم من حين لأخر تطلع ع التحديثات وتعدل محتوى موقعك وصفحاته بما يتناسب مع افكار جوجل الجديدة ومن ضمنها الإسكيما وسرعة الموقع وخلو الموقع من الأخطاء البرمجية بالكود وطريقة ربط المقالات ببعض وازاي تبقى فيتشر اسنيبت .
7- السبب السابع السماح بأرشفة صفحات غير مهمة في موقعك زي صفحة الكتاب اللي بتعيد وتزيد في نفس المحتوى ع الفاضي
اي صفحة غير مهمة اوقف ارشفتها افضلك وخلي جوجل يركز مع المهم فقط .
8- السبب الثامن إختيار هوست سئ او غير مناسب بحجم موقعك
لازم تفكر في إن الموقع كل مايقع او يهنج او يتقل ده بيقرف منك الزائر يبقى ريحه وهات هوست نضيف .
9- السبب التاسع عدم تحديث برمجة او تصميم او تمبلت موقعك
مع الوقت في اكواد بتتلغي واكواد برمجية بتسبب مشاكل لازم يبقى تحت ايدك ديفولبر محترم يقدر يحللك مشاكل الكود اللي بتسبب مشاكل سرعة او بلاوي تانية في موقعك انت متعرفهاش.
10- السبب العاشر استخسارك في موقعك
مدام بتكسب منه حاول تعمله اعلانات في جوجل بشكل دائم ده بيزود ثقة جوجل فيك علي فكره.
11- السبب الحادى عشر عدم إهتمامك بمحركات البحث الأخرى
لازم تضيف موقعك في محركات البحث الأخرى بإختصار بتديك باك لينك وكذلك بتجبلك زيارات كتيرة ودي مهمة ليك جداً.
12- السبب الثاني عشر التوقف عن تحليل منافسيك
لازم بشكل شهري تحلل المنافسين وتشوف اية المميز عندهم وبيعملوا أية احسن منك وتطور من موقعك واستراتيجيته ومحتواه.
13- السبب الثالث عشر عدم الإهتمام بإفادة الزائر
صدقني ممكن اهتمامك بكترة الإعلانات وعدم ترتيب مواضيعها يخنق الزائر ويخليه يخرج الهري الكتير مش هيفيده لازم تقرر وانت بتكتب المقال مش هدفك جوجل هدفك تفيد الزائر بس وهتنجح صدقني .
أعتقد انا بكده لخصت أهم الأسباب اللي بتسبب تراجع في النتايج وعقاب موقعك أتمني الكل يكون استفاد بالتوفيق إن شاء الله
تعليقات
إرسال تعليق